Muaj të tërë pritje për një takim me Ministrin Lekaj

Oda e Afarizmit të Kosovës shpreh shqetësimin për injorimin që Ministri Pal Lekaj është duke i’u bërë kërkesave të bizneseve të cilat duhët të presin me muaj të tërë për të realizuar një takim në lidhje me zgjidhjen e problemeve të infrastrukturës rrugore.

Përfaqësues të Oda e Afarizmit të Kosovës në shkurt të këtij viti zhvilluan një takim me Ministrin Lekaj, me ç’rast i dorëzuan edhe projektin e financuar nga OAK dhe bizneset për rregullimin e rrugës së bizneseve në zonën e Harilaqit në Komunën e Fushë-Kosovës dhe që ka edhe mbështetjen e Kryetarit të Komunës së Fushë Kosovës.

Gjatë këtij takimi Ministri premtoi që do të financoj këtë projekt dhe mjafton vetëm një memorandum bashkëpunimi me Komunën e Fushë Kosvës (http://odaeafarizmit.org/ministri-lekaj-financon-asfaltimi…/).

Pas këtij takimi #OAK realizoi një takim me kryetarin e Komunës së Fushë Kosovës z. Burim Berisha nga i cili morëm përkrahje se është i gatshëm në çdo kohë të realizoj këtë memorandum me Ministrin Lekaj.

Nga ky takim OAK në vazhdimësi është duke kërkuar realizimin e takimit në mes OAK, MIT dhe Komunës së Fushë Kosovës por nuk ka pranuar ndonjë përgjigje, përkundër kontaktimeve të vazhdueshme të zyrtarëve të #OAK-së me kabinetin e Ministrit.

Në ndërkohë në Ministri na është thënë që kjo çështje po trajtohet me prioritet, por Ministri Lekaj për shkak të agjendës ende nuk po gjen kohë që të realizojë një takim.

Meqenëse bizneset që operojnë në këtë zonë, janë biznese të mëdha dhe të cilat kanë problem të madh infrastrukturën dhe përmirësimi i kushteve aktuale është mëse i nevojshëm për zhvillimin e veprimtarisë së tyre.

Andaj, OAK kërkon nga Ministri Lekaj që të tregohet më shumë bashkëpunues dhe të ndërmarrë veprimet e nevojshme në mënyrë që kjo rrugë të rregullohet ashtu siç është premtuar.

OAK vlerëson se neglizhenca që është duke ju bërë përkrahjes së bizneseve nuk i kontribuon klimës së të bërit biznes në Kosovë.